देरा तोम्पा ल्होकाइने

दमक नगरपालिका धिमाल प्रथम नागरिक एअ्बासार थुकाका कार्यक्रमको बेलाता हिङपाका कविता । दमक रेडक्रस हल, दमक पसुहाट, झापा, नेपाल । Asoj 29, 2075 (15 Oct, 2018).
देरा तोम्पा ल्होकाइने
सोम चातेला
केलाइ हासु, केलाइको पहिचान हाइ ?
काङको संस्कृति, राउ रो नाल्पाका काथा हाइ ?
काङको इतिहास, गोउरब पाका काथा हाइ ?
केलाइ मापानु, एला माभोःनु हेलाउ भोःकाङ ?
केलाइ मालेखेनु, केलाइ रेकर्ड माताअ्नु हासु ताअ्ताङ ?
काथा इतिहासको, संस्कृतिको, राउको, पहिचानकोङ ।

लाम्फा देरा तोम्पाको सर्बेक्छेन पाइने
रेम्का काथागेलाइ, तथ्याङ देरा किपाङ ओल्हेपाइने
देरा तोम्पाको बिग्यागेलाइ माझि, धामि, ओझा
स्वास्थे, ओसेरेपोइति, जामालाइ, बेबालाइ, सिक्स्या
वाराङबेराङ, धानाधानि गोताङ काथा
म्हुइसिरिपा खेकाइने, भोःकाइने, ओल्हेपाइने ।
काथा जनचेताना रो राजनितिको एला
धेमालाइको बार्का देराता ए साअ् बाहुन ह्यावा
वाङ जेङखे अध्यक्छे नेता आरो सामाजसेबि
हाइपालि वाला हेलाउ बिचार पान्हाहि कुनु धेमालाइ ?
कारन भोःसु, काथा गिसु कालाउ देरा तोम्पा ल्होसु ।
काथा हि सिक्स्याको जामालाइ चोमालाइ पो¥हेपाका
साअ्ता आबा आमाइ चेरसुनु जामालाइ हाइ धिरावा ?
गोरा चि आम्तेङ सालेङता गाम्राइतेङ हिनु हाइ धिरावा ?
देरा तोम्पाता ल्होहोइ तास, गोरा भोःनु हाइ धिरावा ?
काथा किपाङ माटाहाकार, सिलिमादोका दोनु हाइ धिरावा ?
देरा तोम्पाता दिनाङ चेरसुनु, दानाइसुनु हाइ धिरावा ?
कालाउ केलाइको जामालाइ हाइ धिरावा, हाइ ग्यावा ?
साअ्ता आबा आमाइ एल्का काम पानु
जाहानता एल्का दामा तेःका साँस्कार हिनु
पो¥हेकालेखेका, ग्यानगुन, सिपकलाको साँस्कार पिनु
बाताबरन बानाइपिका, सोपोन माङपाका काथा
झाराङ पाखे का बु पालि गोयाङ दोअ्का भाबाना
जारि जोपिनु, म्हुइनासोङ मलजल पानु
हाइ केलाइ न्हुताङ ? केलाइको जामालाइ कमजोरि हि रो ?
एल्का साँस्कार प्याइने, एल्का काम पाइने
एल्का दामाता बारा खामालाइ त्याइने
नानिको जुम्निङ फल निङका हेसो बे हि रो ?
देरा तोम्पा बानायाइने, झाराङ ल्होकाइने
साकारात्मक सोच रो काम पाइने
जामालाइ धिरावा, ग्यावा कालाउ पापाइने ।
झाराङको मन मिलिनु हाइ गारो हि रो ?
झाराङ दोफाङ तेःनु झार ते डेगोर जेङखे
झाराङ आतुतुइपा जोम्पानु सहकारि, बेक जेङखे
झाराङ एकाता जेङनु सक्ति जेङखे
झाराङ दोफाङ आगाइनु माफा थामेता थुकाखे
परिबर्तन, उपलब्धि कालाउ सामाज सभ्य जेङखे...२
(दोहोइ)